Comunu de Serrenti: Sa Biblioteca Comunali fait sciri a totus ca de su mesi de ladàmini 2022 at a inghitzai sa rassinna culturali “Serrenti d’Autore” po contu de sa Cooperativa Tesauro e in collaboratzioni cun su Grupu de Letura “Il sentiero dei libri” e s’Amministratzioni comunali. Is atòbius s’ant a fai in s’aposentu de su Ex-Ma.

Comunu de Mara Arbarei: Torrant a cumintzai is atóbius de letura espressiva a incuru de s’atori maresu Fautso Siddi, in collabboratzioni cun su Comunu de Mara Arbarei e sa Biblioteca Comunali. Si faint su sàbudu a merii in is localis de sa Biblioteca Comunali a cumintzai de sàbudu s’1 de Meseladàmini 2022, a is 5 de a merii (17.00).

Comunu de Pabillonis: Si fait sciri ca funt abertas is iscritzionis, (de presentai aintru de su 5 de Meseladàmini), po un’agiudu a fai is cómpitus su pustis de iscola.  

Comunu de Seddori:Su Polu Museali de su Comunu s’ammanniat. Mèrcuris su 5 de mesi de ladàmini a is ses e mesu de a merì in s’aposentu de su Cunventu s’at a tenni sa tzerimònia po s’abertura de su Museu Stòricu Etnogràficu de is Padri Cappuccini. Gràtzias a custa incingiadura su Polu Museali Seddoresu, formau de su Casteddu e de su Museu de su Pani, si arricat de una atra sea espositiva, chi afortiat sa proposta culturali de sa tziatdi de Seddori e avalorat sa promotzioni turìstica de su territòriu. 

Comunu de Igrèsias: “Su Spantu” est su tema de sa “Fiera del Libro” de Argonautilus 2022 chi si fait intra is comunus de Igrèsias, Domusnoas, Gonnesa, Portescusi, Bidda Matzràxia e Musei. 

Comunu de Muristeni: De su 28 de Cabudanni, dónnia mércuris de is 4 a is 6 de a merii (16:00-18:00), in su Tzentru de Agregatzioni Sotziali de Muristeni in bia Natzionali torrant a inghitzai is atividadis po is pipius de is 3 fintzas a is cincu annus.

Comunu de Aristanis: Fonti: "La Gazzetta del Medio Campidano": De cras a sàbudu su 1 de mesi de ladàmini, is lagunas de Aristanis, de Mar’e Pontis e de Mistras, in su territòriu de Cabras, e de Marceddì in cussu de Terraba, funt is protagonistas de su primu Festival de si Pischeras.

Comunu de Gùspini: Su 30 de Cabudanni cun "Pani, casu e binu a rasu" inghitzat sa série de tres atóbius "Contausí: intra arregodus de pipiesa e speras po su benidori". S’Ufítziu Língua Sarda de sa Províntzia de su Sud Sardigna, sea de Gúspini (L. 482/99, L.R. 22/2018), e s’Assótziu “Il Mercatino dei Sogni APS”, in collabboratzioni cun is atividadis e is assótzius localis, s’abetant su 30 de Cabudanni, h.16.30, in sa Pratzita "Dei Girasoli". Is atóbius funt a indonu.