Comunu de Carbònia: Domínigu 8 de Meseidas 2019 in su Teatru Tzentrali de Pratza Roma si fait sa rapresentatzioni "Riccardo at fatu is annus". Su costu de su billetu est de 10 € ma su scopu de su spetàculu est nóbbili, difatis, totu s'incàsciu andat a s'Assótziu "Le Rondini" po su Tzentru de Domótica "Domo Noa" e a sa Domu de Arritzidura po malàdius de càntziru de Casteddu.

Comunu de Biddacidru: Fonti: "La Gazzetta del Medio Campidano":  Acabbu de cida arricu de acontéssius, programmaus in su cuntestu de su "Dicembre Letterario". Sàbudu 7 de Meseidas s'Archiologu Nicola Dessí presentat su líbburu cosa sua "La preistoria della Sardegna: dal Paleolitico all'Età del Rame" e Domínigu 8 de Meseidas s'atóbiu cun su musitzista Moses Concas.

Comunu de Carbònia: Si torrat a annoai ocannu puru s'atóbiu cun "Il Villaggio di Babbo Natale". "Un'acontéssiu de non pérdiri po tantis pipius chi benint non scéti de Crabònia e de su territóriu cosa nosta ma de is àteras zonas de su Sud Sardigna, a cunfirma de sa grandu capatzidadi atrativa de su "Villaggio di Babbo Natale", in gradu de atirai in is tres editzionis passadas unus cantu milla bisitadoris.

Comunu de Gùspini: Po su 2019 puru est prevídiu su calendàriu de acontéssius de Paschixedda organizaus de su Comunu de Gùspini imparis cun su Tzentru Cummertziali Naturali APICE, cun s’Assótziu Pro Loco Gùspini, cun is Assótzius e is operadoris Cummertzialis chi òperant in Gùspini e chi ant acunsentiu a su progetu.  Su calendàriu est diaderus arricu meda de acontéssius, difatis, inghitzas su 8 de Meseidas 2019 e acabbat su 5 de Gennaxu 2020.

Comunu de Guasila: Su 8 de Meseidas de su 2019,  Guasila si ponit su bistiri de su domìnigu po sa de 5 editzionis de Saboris Antigus.

Comunu de U Pàize: S'editzioni de su 2020 de Girotonno est intra de is primus acontéssiu tzertificaus in Regioni Sardigna. Cenàbara 6 de Meseidas 2019, de is tres a is ses de a merí in sa sala de su ExMe nc'est su "Workshop" dedicau a s'inghitzu de is trabballus de su GIROTONNO 2020. Totus is operadoris turísticus, is posaderis, is referentis de is assótzius culturalis, is ghias, is operadoris de servítzius, e totu sa comunidadi est cumbidada a pigai parti a su "workshop", po si cunfrontai asuba de is propostas chi permitint un' avaloramentu prus mannu de is aspetus ambientalis e sotzialis e de prumotzioni de su territóriu.

Comunu de Biddacidru: S'Assessorau a sa Cultura de su Comunu de de Biddacidru at organizau unu merí spassiosu in cumpangia de Gigi Tatti chi presentat su líbburu cosa sua: "Scracàlius. Barzelletas in língua sarda". S'acontéssiu est su 6 de Meseladàmini 2019 in su "Caffe Letteràrio".

Províntzia de su Sud Sardigna: Sa Províntzia de su Sud Sardigna cumbidat totus is assótzius culturalis chentza iscopu de lucru, chi in is úrtimus tres annus (2016 - 2018) ant fatu atividadis in su setori de sa Língua e Cultura Sarda,a partitzipai a custu bandu po s'assignatzioni de is cuntribbutus, cunformas a sa L. 482/99, po s'annualidadi 2018. Is domandas depint lompi aintru de su 13 de Meseidas 2019 a s'indiritzu: pec protocollo@cert.provincia.sudsardegna.gov.it