Comunu de Casteddu: In sa Biblioteca Tuveri e in sa Biblioteca piciocus MEM de Casteddu ddoi ant a essi tre atòbius su 24 e 25 gennàrgiu de is cincu de a merì (17.00), po 10 postus disponìbilis. Tocat a si prenotai.

Comunu de Seddori: Su teatru comunali de Seddori dd’ant dedicau a Akinu (Francesco) Congia, sonadori e cantadori, poeta, scritori e connoscidori de stòria, cultura e lìngua sarda (1911-2011). In Meseidas 2022, impari a s’inghitzu de sa stagioni teatrali noa, ant apicau sa targa po arregordai su seddoresu Akinu Congia chi in sa vida sua at sempri traballau po sa cultura: at portau su primu tzìnema in Seddori, at fatu nasci sa Pro loco e is diferentis grupus folk ma pruschetotu at aprontau unu patrimòniu poeticu e musicale in lìngua sarda de valori mannu.  

Comunu de Gùspini: S’Istitutu Michelangelo Buonarroti est acanta a is fèminas e a is òminis chi in Iran si funt furriendi contras sa violatzioni de is deretus insoru. Sàbudu su 21 de gennàrgiu 2023, a is dexi de a mengianu, in sa sea de Guspini, in Bia Velio Spano 7, is alunnus de s’Istitutu Tècnicu s’ant a segai unus cantu de pilus cumenti a sinnu de protesta contras is violatzionis de is deretus fundamentalis. Is pilus segaus ant a essi imbiaus a s’ambasciada de s’Iran in Itàlia, acumpangiaus de is messàgius  scritus de is alunnus.

Comunu de Casteddu: Is atividadis cummercialis cun sea in bia Paoli e is de is bias acanta chi bolint pigai parti a s’eventu artìsticu “arteXarte 2023” ant a depi presentai sa manifestatzioni de interessi intro is seti de a merì (19.00) de su 31 de gennàrgiu 2023. Is operadoris cummertzialis ant a depi donai sa disponibilidadi po amostai in sa vetrina de sa butega insoru una òpera artistica po unu mesi.

Comunu de Pabillonis: Sa Scola de s’Infàntzia de Pabillonis in collaboratzioni cun s’Ufítziu de Língua Sarda de sa Províntzia de su Sud Sardigna, sea de Pabillonis (L. 482/99 e L.R. 22/2018) cumbidat is Mammas e is Babbus de is pipius chi abbitant sa Scola de bia Bologna, su Síndigu e s’Assessori a sa Cultura de Pabillonis, a partecipai a sa Festa de Paschixedda in Língua Sarda, chi si fait in su saloni de sa scola giòbia su 22 de Meseidas a is 10 de a mengianu.

Províntzia de su Sud Sardigna e Comunu de Biddaramosa: S'Ufítziu de Língua Sarda de sa Províntzia de su Sud Sardigna, sea de Biddaramosa,  in collaboratzioni cun s'assótziu culturali Sa Bèrtula Antiga, fait sciri a is tzitadinas e a is tzitadinus  chi  su 15 de Mesidas a is 16:30 in sa pratza de sa crésia de Santu Lutzífuru nc'est su labboratóriu culturali in Língua Sarda asuba de is Giogus Antigus.

Províntzia de su Sud Sardigna e Comunu de Igrèsias: S'Ufítziu de Língua Sarda de sa Províntzia de su Sud Sardigna, sea de Igrèsias,  in collaboratzioni cun s'assótziu culturali Sa Bèrtula Antiga, aparìciat po su 17 de su mesi de Idas una bìsita culturali a sa penìsula de su Sinis indiritzada a is residentis. Custa bìsita tenit sa punna de fai connosci a totus s’àrea archeològica de Tarros, sa Turri Ispagnola e su museu de Monti Prama. Su viàgiu est a indonu e is postus dispobìbbilis funt 50.

Províntzia de su Sud Sardigna e Comunu de Biddaramosa: S'Ufítziu de Língua Sarda de sa Províntzia de su Sud Sardigna, sea de Biddaramosa,  in collaboratzioni cun s'assótziu culturali Sa Bèrtula Antiga, fait sciri a is tzitadinas e a is tzitadinus  chi  funt abertas is iscritzionis po su labboratóriu didàticu-culturali in Língua Sarda asuba de su Ballu sardu chi si fait su 10 de Meseidas in sa pratza de  sa crésia de Santu Lutzífuru in Badderamosa. Su labboratóriu est a indonu.