Comunu de Gùspini: Prus de 50 crésias de su Romànicu s’ant a podi abbisitai a indonu in custus duus finis de cida chi funt lompendi, 10 – 11 e 17 – 18 de Cabudanni. Intra custas 15 funt de sa Províntzia de Aristanis, scioberadas po s’initziativa nomenada “Is diis de su Romànicu”, in sa prima editzioni sua in su panorama de is acontéssius sardus. Su Comunu de Gúspini aberrit a su púbblicu sa Crésia de Santa Maria de Malta gràtzias a sa collabboratzioni de sa Parróchia su 18 de Cabudanni a mengianu de is 10 a sa una (10.00-13.00) e a merii de is 4 a is 7 (16.00-19.00)

Comunu de Sant' Èngiu: Fonti: "La Gazzetta del Medio Campidano": Sàbudu su 10 de cabudanni a is noi oras de noti (21.00), in su Teatru comunali de Santu ‘Èngiu, s’at a fai su spetàculu “Pss Pss” de sa cumpangia Baccalà aprontau e rapresentau de Camilla Pessi e Simona Fassari. Unu spetàculu chi amesturat brullas a giogus, is artistas de arruga.

Comunu de Sant' Èngiu: Fonti: "La Gazzetta del Medio Campidano": Sa de dexi rassinna teatrali de Santu ‘Èngiu, organizada de sa cumpangia Muredda, at otènnidu una resessida manna cun su contributu de s’assessorau a sa lìngua sarda de su Comunu e in collaboratzioni cun sa Fita (Federatzioni Italiana Teatru Amatoriali) Sardigna e sa Pro Loco. Sa rassinna est anadat beni meda siat po sa genti chi at partetzipau siat po su spàssiu chi at donau.

Comunu de Serrenti: «Jonathan Franzen says no», naràt Tom Gauld asuba sa tìrria contras is tecnològias noas e is social media po contu de su scritori statunitensi. Crossroads, s’ùrtimu romanzu de Franzen publicau de pagu de Einaudi in sa tradutzioni de Silvia Pareschi, no currit arriscus de custu tipu amostat cali siat sa dimensioni ideali de su scritori: sa contemporaneidadi benit lassada in foras, sa stòria ponit is arrèxinis in su perìodu de mòvida intra s’acabbu de is annus Sessanta e s’inghitzu de is Setanta e Franzen portat a innantis is punnas de sa scritura sua, est a nai sa riflessioni asuba sa crisi de sa borghesia e is frustratzionis de dònnia dì.

Comunu de Biddanoa de Forru: Mancant 3 dís a s'inghitzu de sa manifestatzioni “Mestieri, saperi e sapori del passato”. Funt duas dís arricas de esperiéntzias de bivi intra de labboratórius, espositzionis, ammostas de arti, cunvénniu, abbisitas ghiadas, música e giogus antigus.

Comunu de Mara Arbarei: S'Amministratzioni Comunali de Mara Arbarei impari a sa Pro Loco Mara Arbarei APS aparíciat po totus is citadinus unu merí de spàssiu in cumpangia de Lughené Associazione culturale cun is 20 Giogus Mannus de Linna cosa sua. S’eventu s’at a fai cenàbura 9 de cabudanni de is oras de is 17.00 a is oras de is 20.00 in Pratza de Corti.

Comunu de Tuili: Su Comunu e sa Pro Loco de Tuili aparíciant po sàbudu 10 de Cabudanni sa de dexi editzionis de su wine e food festival “September in Tuili – Percorsi di gusto tra musica vino e arte”. Peri is bias de su centru stóricu de sa bidda, a incarrerai de is oras de is 18.00.

Comunu de Ùssana: Su Comunu de Ússana bandiscit difati su primu cuncursu dedicau a sa chirca de is fotografias prus antigas e de significu de sa comunidadi e de is traditzionis ussanesas. Funt invitaus a partecipai totus is citadinus de Ússana e non, inviendu una cópia de is fotografias intra de su 30 de cabudanni 2022, a s’indiritzu de posta eletrónica info@comune.ussana.ca.it o a s’ufítziu protocollu, me is oràrius de abertura a su púbblicu.