Províntzia de su Sud Sardigna e Comunu de Biddacidru: Sa Províntzia de su Sud Sardigna in collabboratzioni cun su Comunu de Biddacidru organizat su labboratóriu didàticu- culturali in Língua Sarda “Mércuris in su Tzínema” chi si fait, a inghitzai de su 9 de Martzu, dónnia mércuris in sa sala letura de sa Mediateca Comunali – Tzentru @ll in, in bia Parrocchia 190, Biddacidru. Su labboratóriu est a indonu.

Comunu de Seddori: Fonti: "L'Unione Sarda": Sexi annus podint bastai. Luegus in Seddori iat a podi nasci su Museu giudicali de sa Sardigna. Is strobus burocràticus no funt acabbaus, gràtzias a s’acòrdiu cun su Ministeru de is Benis culturalis e sa Regioni, s’importanti riferimentu culturali iat a podi biri sa luxi. Alberto Urpi, Sìndigu de sa tzitadi de su Campidanu de Mesu est cumbatendi cun totus is fortzas po arrennesci a inghitzai s’òpera.

Comunu de Gùspini: Unu cuncursu fotogràficu e un’ammosta po aguantai biu su spíritu de su Carnovali. Si sperat puru chi cumparessant is “Cambas de Linna”. Ocannu puru Gúspini, po nexi de sa pandemia de Covid-19, depit fai de mancu de sa sfilada traditzionali in màscara de su Carnovali Guspinesu “Cambas de Linna”. Gúspini a dónnia manera no bolit fai de mancu de afestai su Carnovali assumancu cun is modalidadis diferentis chi custa emergèntzia si permitit de fai. Ducas si torrat a proponni su cuncursu fotogràficu cumentzau in su 2021 e cunfirmau po su 2022 puru chi prémiat sa màscara prus bella de su Carnovali Guspinesu. 

Comunu de Serramanna: Fonti: "La Gazzetta del Medio Campidano": Grazia Deledda in “Esalettura”. S’impinnu de s’Unioni Italiana de is Tzurpus de is Ipovedentis de Nùgoro in sa promotzioni de su progetu “Grazia Deledda in esalettura” at biu puru sa partetzipatzioni de su Campidanu de Mesu cun d-unu eventu in Serramanna.Su progetu bolit amostai ca, candu una persona chi no biit impreat su sistema de letura e scritura braille, podit gestiri is informatzionis culturalis cumenti fait unu chi biit.

Províntzia de su Sud Sardigna: S'assótziu “Sarditinera onlus” chi at organizau s'abbisita a su Museu e a su Nuraxi “Genna Maria” de Biddanoa de Forru  fait sciri a is tzitadinas e a is tzitadinus chi non si arritzint prus prenotatzionis po s'abbisita a su nuraxi e a su museu, ca s'est sodigau su númunu siat po s'abbisita de sàbudu 26 de Friaxu 2022 siat po cussa organizada po sàbudu 5 de Martzu 2022.

Províntzia de su Sud Sardigna: In su cuntestu de is atividadis culturalis de sa Províntzia de su Sud Sardigna, s'assótziu "Sarditinera onlus" organizat, po sàbudu 26 de Friaxu 2022, un'abbisita a indonu a su Nuraxi e a su Museu “Genna Maria” de Biddanoa de Forru. Podint partitzipai totus ma tocat a si prenotai.

Comunu de Biddacidru: Lompit a sa de duas Editzionis su Prémiu po Tesis de Làurea "Giarr' 'e Janas" de s'Assótziu culurali Salvator Angelo Spano. Scadéntzia su 22 de Làmparas 2022

Comunu de Quartu Sant'Aleni: Is espertos de is minorias linguìsticas istòricas de sa Repùblica a cunvegnu in Quartu Sant'Aleni in ocasione de sa Die de sa Limba de bartzolu de s'Unesco. Sàbadu 26 de Freàrgiu, in sa Sala de s'Afrescu de sa Natzione, in su cunventu betzu de is paras caputzinos de bia “Brigata Sassari”, ddoi at un'atóbiu pùblicu de riflessione e cunfrontu subra de sa situatzione de is limbas de minoria italianas, tra custas sa sarda, reconnotas cun sa L.482/99.