Comunu de Seddori: Giòbia su 19 de gennàrgiu, in sa biblioteca comunali, ddoi funt stètias is premiatzionis de su cuncursu de pitura e de fotografia de s’ùrtima editzioni de sa Festa de su Burgu. Una giuria de espertus at avalorau is òperas pitoricas (pretzidas in mannus e pipius/piciocus) e is fotografias in cuncursu. Edoardo Murgia at postu de acòrdiu is espertus chi ant valutau is òperas pitoricas e est arribau primu.

Comunu de Casteddu: In sa Biblioteca Tuveri e in sa Biblioteca piciocus MEM de Casteddu ddoi ant a essi tre atòbius su 24 e 25 gennàrgiu de is cincu de a merì (17.00), po 10 postus disponìbilis. Tocat a si prenotai.

Comunu de Seddori: Su teatru comunali de Seddori dd’ant dedicau a Akinu (Francesco) Congia, sonadori e cantadori, poeta, scritori e connoscidori de stòria, cultura e lìngua sarda (1911-2011). In Meseidas 2022, impari a s’inghitzu de sa stagioni teatrali noa, ant apicau sa targa po arregordai su seddoresu Akinu Congia chi in sa vida sua at sempri traballau po sa cultura: at portau su primu tzìnema in Seddori, at fatu nasci sa Pro loco e is diferentis grupus folk ma pruschetotu at aprontau unu patrimòniu poeticu e musicale in lìngua sarda de valori mannu.  

Comunu de Gùspini: S’Istitutu Michelangelo Buonarroti est acanta a is fèminas e a is òminis chi in Iran si funt furriendi contras sa violatzioni de is deretus insoru. Sàbudu su 21 de gennàrgiu 2023, a is dexi de a mengianu, in sa sea de Guspini, in Bia Velio Spano 7, is alunnus de s’Istitutu Tècnicu s’ant a segai unus cantu de pilus cumenti a sinnu de protesta contras is violatzionis de is deretus fundamentalis. Is pilus segaus ant a essi imbiaus a s’ambasciada de s’Iran in Itàlia, acumpangiaus de is messàgius  scritus de is alunnus.

Comunu de Casteddu: Is atividadis cummercialis cun sea in bia Paoli e is de is bias acanta chi bolint pigai parti a s’eventu artìsticu “arteXarte 2023” ant a depi presentai sa manifestatzioni de interessi intro is seti de a merì (19.00) de su 31 de gennàrgiu 2023. Is operadoris cummertzialis ant a depi donai sa disponibilidadi po amostai in sa vetrina de sa butega insoru una òpera artistica po unu mesi.

Comunu de Pabillonis: Sa Scola de s’Infàntzia de Pabillonis in collaboratzioni cun s’Ufítziu de Língua Sarda de sa Províntzia de su Sud Sardigna, sea de Pabillonis (L. 482/99 e L.R. 22/2018) cumbidat is Mammas e is Babbus de is pipius chi abbitant sa Scola de bia Bologna, su Síndigu e s’Assessori a sa Cultura de Pabillonis, a partecipai a sa Festa de Paschixedda in Língua Sarda, chi si fait in su saloni de sa scola giòbia su 22 de Meseidas a is 10 de a mengianu.

Comunu de Gùspini: Sa Biblioteca Comunali in collabboratzioni cun su Comunu de Gùspini, s’Ufítziu Língua Sarda Províntzia Sud Sardigna, sea de Gùspini (L. 482/99 e L.R. 22/2018) e sa Consulta de sa Língua e de sa Cultura Sarda de su Comunu organizant sa Tòmbola de Paschixedda in Biblioteca (bia San Nicolò n.9) giòbia su 22 de Meseidas 2022. S’ant a fai duus turnus cun màssimu 12 partecipantis donniunu. Po pediri informatzionis e po si prenotai (aintru de su 20 de Meseidas) tocat a tzerriai a su n. 070/9760602 o scriri una e-mail a: biblioguspini@bibliotechelinas.it

Comunu de Seddori: Fonti: "La Gazzetta del Medio Campidano": Po sa Stagioni 2022-2023 de La Grande Prosa Musica Danza Circo Contemporaneo Prosa, organizada de su CeDAC – Circuitu Multidisciplinari de su Spetàculu in Sardigna in su Teatru Comunali de Seddori, cun su patrotzìniu e s’agiudu de su Comunu de Seddori, de sa Regioni Sardigna e de su MiC / Ministeru de sa Cultura e cun su contributu de sa Fondatzioni de Sardigna. Seti tìtulus in su cartelloni de meseidas a su mesi de abrili cun is nòminis prus importantis de su spetàculu italianu.