Comunu de Igrèsias: Su 4 de Maju 2019,in s'Àula Magna de s'Istitutu Mineràriu de Igrèsias,po su de 150 anniversàrius de s'abbisita de cuntrollu fata de Quintino Sella in is minieras de sa Sardigna, nc'est sa presentada de su líbburu: "Quintino Sella in Sardegna taccuino di viaggio" de Graziella Panichi.

Comunu de Santu Antiogu: Inghitzant sàbudu 4 de Maju is afestus in onori de su Patronu de sa Sardigna, Santu Antiogu Màrtiri, lómpius a sa de 660 editzionis. Sa Festa prus antiga de sa Sardigna est cumenti a sémpiri un'ammesturu de fidi, divotzioni, costumu, cultura, spetàculu e folclori. Sa festa durat fintzas a su 6 de Maju.

Comunu de Pabillonis: Cenàbara 3 de Maju 2019, a is cuatru de a merí (16,00), in is aposentus de sa Scola Média bécia, in bia Sardigna,  in su cuntestu de su cursu de alfabbetizadura de Língua Sarda, nc'est sa presentada de su líbburu:" Su latinu est limba de sos sardos. Latinum língua sardorum est" de Bartolomeo Porcheddu.

Comunu de Serramanna: Cenàbara 3 de Maju 2019, a is cincu e mesu de a merí (17,30), in sa Biblioteca Comunali, nc'est sa presentada de su líbburu de Prof. Francesco Cesare Casula*: " I Giganti di Mont'e Prama", partitzipat sa Dot.ra Sara Chirra, presentat Andrea Cossu.

Comunu de Gèsturi: Sa Províntzia de su Sud Sardigna imparis cun su Comunu de Gèsturi at organizau unu Cursu de Língua Sarda de I livellu. Su cursu est in donu.

Comunu de Lunamatrona: Sa Províntzia de su Sud Sardigna imparis cun su Comunu de Lunamatrona at organizau unu Cursu de Língua Sarda de alfabbetizadura. Su cursu est in donu. Funt abertas is iscritzionis.

Comunu de Gùspini: Su Comunu de Gùspini afestat su de 74 anniversàrius de sa Resisténtzia e de sa Libberatzioni de su nazifascismu cun sa proietzioni de su film documentàriu "Libere" de Rossella Schillaci, in programma cenàbara 26 de Abrili, in is Domus a Corti, a ses e mesu de a merí (18,30).

Comunu de Silius: In Silius, de su 25 de Abrili fintzas a su 2 de Maju, nc'est sa de 3 editzionis de ""Festival Literàriu 3L - Su  Festival de is Líbburus, de su Trabballu e de is Libbertadis".